شعر بدوي عن الأب

• ذات صلة
• شعر بدوي عن الفراق
• شعر بدوي عن الشوق

قصيدة: يا بوي أكتب فيك من الشعر أبيات

قال الشاعر صاحب القصيدة:^[١]

يا بوي أكتب فيك من الشعر أبيات

يحلى فيك أجمل وأحلى قصيدة

عساك دايم مني قريب المسافات

لأجلك تهون المسافة لو هي بعيدة

لا غبت عني عسى ما طول الغيبات

ونشوفك كل يوم وأعوام مديدة

دوم على البال يا عزيز الصفات

كل خطوة فيك صح ورأيك سديدة

غيبتك تزيد من الحب عبرات

وأنتظر كل يوم منك أخبار جديدة

غالي ابن غالي من غير لفات

الله يديمك على المحبة أيام سعيدة

أرجوك لا تبتعد وتزيل كل زلات

عن الغالي اللي أحبه ويا مر وأزيده

قصيدة: المدح لا مني بغيت أمدح إنسان

قال الشاعر بدر الضبعان:

المدح لا مني بغيت أمدح إنسان

أجيب من شرد قصيدي فرايد

وأرضيه من جزل القوافي والألحان

لو كان بعض الناس مرضيه كايد

لا صـار لـه قـدر ومعزة وسلطان

بقلوبنا مـن بين كل البدايد

أبوي وإن مريت باسمه ولا هان

تعجز حروفي تنصفه بالقصايد

لأنه عظيم ولا يبي فيه برهان

ولأنه كبير ولا يبي له شهايد

ولأنه كريم ولا يجي فيه نقصان

ولأنه فريد من الرجال الفرايد

ولأنه أبوي وتاج راسي وعنوان

مجدي على مر السنين البعايد

لا من طروه في كل ديوان

ما قيل غير إنه على الناس زايد

يا ما بنوا للطيب من طيبته شان

وصارت لهم أصغر فعوله عوايد

قلبه وطن للي شكى مر الأزمان

مزبن خويه بالليال الشدايد

الله يقدرني على رد الإحسان

وأعطيه مـن باقي سنيني مدايد

قصيدة: يا بوي جعلك للبقا والمكاسيب

قالت الشاعرة العنزية:

يا بوي جعلك للبقا والمكاسيب

عمري بدونك يالذّرا ويش أبي به

يا بوي تسأل عن شفاك المراقيب

طلعة سواتك للنّوايف غريب ليه

المرض ما يعرف الزّين والعيب

ما يدري إنك للمخاليق هيبة

أبسألك وش به غزا وجهك الشيب

والقلب لايع والنواظر شحيبة

وش بك تحاتي لا نوى الموت

تغريب تخشى علينا بالليّالي الكئيبة

خذ دلّتك واركي على مسند الجيب

واعطني شماغك بلثمه وأحتمي به

ونروح لأرض بها العشب والطيب

وتسمع كلام يا الغلا تحتفي به

يا بوي بنتك لا انحكى بالتّجاريب

كل يشق لهيبة الصّيت جيبة

يا بوي ماني من سوات المخاريب

اللّي تجيب لعلية القوم خيبة

وماني من اللّي لامشت حفّها الرّيب

كأنا من اللّي مايدنّس حليبه

مرفوع شاني عن غرام المكاتيب

وأكبر من إنّي أرتضي بالحبيبة

أنا غرامي لا ابتدوا بالتّراحيب

نفوس الأوادم في وجودي رحيبة

وإن كان زيني فتنة للمصاويب

أحط وجهي بالحريق ولهيبه

زيني أبيعه وأشتري سمعة الطّيب

اسم ينومس بالصّروح الذّهيبة

وإن كان عندي بالحلا شي صعيب

عندي جدود ما رضت بالغليبة

دموع القبايل في لقانا مساكيب

كن المقابر لا حضرنا قريبة

خضّبت لك كفّي من العز تخضيب

ورفعت راسي للنّجوم الصّعيبة

والله لأسدّك بالفعول المصاليب

والله لأشيلك بالرخا والمصيبة

طلع المعالي ما انحكم للشّواريب

بنت وأناطح فارس القوم طيبه

ويا شيخي أبشر لو تدور الدّواليب

بنتك إلا منّه عوى الذّيب ذيبة

قصيدة: ترتجيني يا عسى الله ما يخيب لك رجاك

قال الشاعر فزّاع:

ترتجيني ياعسى الله ما يخيب لك رجاك

صاين عهدت الاهك باليدين وبالمتون

الحقيقة وإنت تدري ما يعززني سواك

والسبب واضح على اللي يدركون ويفهمون

والشعر وإن كنت بمدح بالشعر هذا وذاك

إنت حقك فوق هامات القصايد واللحون

العفو وأستغفر الله بس أحس إنك ملاك

ساع تجلس وأتكلم يمتلي صدري سكون

وأتطمن وأملك الدنيا بجلساتي معاك

وإن تنهض عز طرفك تنكسر كلّ العيون

والله إني لو كثر خيري فأنا خيري ذراك

ويش أكون؟ شوفني رجال كامل بس دونك

وش يكون العمر من دون اجتهادي في غلاك

وش يكون العطف والرحمة بدونك وش تكون؟

يايبه تكفى لعاد تشيل هم في حشاك

يكفي إنك قد تجرعت الليالي والغبون

يايبه يا نور عيني شب عمري في هناك

والله إنه أبرد من الما على كبد الظعون

يايبه يا جعل روحي فدوة لموطئ خطاك

حطني بينك وبين الوقت وكبار الطعون

ايبه يا جار كبدي أنذبح ولا أعصاك

عقب اللي قولوا وقالوا وهم ما يفعلون

العمر والنفس واللي أملكه كله فداك

وأعرف إنه ربع حقك وإنت حقك ما يهون

قصيدة: كلمة شكر يا بُوي ما توفّي الشعور

قالت الشاعرة بنت المعاني:

كلمة شكر يا بوي ما توفي الشعور

و إحساسي صوبك يا بعدي أكبر كثير

مهما شكرتك لازم أشعر بالقصور

لأن عيني دايم تشوفك كبير

تتكحل عيوني ويغمرها السرور

كل ما تشوفك مبتسم قلبي يطير

يا نور كل ما شفته زاد بوجهي نور

ما دامك إنت بخير هالدنيا بخير

يا بوي لو لفيت أنا العالم أدور

بلقاك شي بهالزمن ماله نظير

يعني اختصار اللي بقوله من شعور

روحي يا أغلى ناسها تحبك كثير

قصيدة: العين صبت دمع ما مس جفنها النوم

قال الشاعر صاحب القصيدة:

العين صبت دمع ما مس جفنه النوم

من شفت إني الأبو خالي مكانه اليوم

يا بويه وين رحلت والمن عفت الهموم

أو تدري إني من الحزن متعذب أو ملجوم

بعدك أذل أو علي وأكضي العمر مسكوم

ما ظن بعد وسط العين ظل ماي

يا شمعة الدنيا بغيابك ظل ماي

ما سامع يبويه بيوم ظل ماي

الظل للشجر واضح هو فيه وأدري

إنت في الشجر وأكثر بعد منه وأيامه

قصيدة: أبوك قبل الله مع الوقت يبلاك

قال الشاعر سعود العواجي:

أبوك قبل الله مع الوقت يبلاك

قدم له الطاعة وأحسن تأدبك

وصاك ربي والنبي فيه وصاك

من قبل لا يوصيك بأغلى قرايبك

بتشوف كأنك حتى ناتج سواياك

لذلك احرص قبل ربي يعاقبك

اسعَ وقول يابُوي أدور رضاك

ما جيتك إلا ودي أسمع مطالبك

ولا تصد لا طرّاك باسمك وناداك

قل سمّ وأمر لا تلقيه غاربك

وش عاد لو يامرك دايم وينهاك

عيب بوجه أبوك تعقد حواجبك

هذا أبوك اللي من المهد ربّاك

حتى قوى عودك وخطت شواربك

يومك طفل ما تشرب الماء بيمناك

كم جيت له ضامي وبيديه شرّبك

يشيلك إن شافك تعثرت بخطاك

يخاف حتى من المشي لا يتعبك

حتى الحكي لا من تلعثم به شفاك

يعلمك نطق الحروف ويدربك

يرتاح لا شاف الفرح في محياك

ويزعل على اللي يحر قلبك ويغضبك

يا ما كتم حزنه وهو يسمع بكاك

وإن حس يضيقتك ضمك ولاعبك

واليا طلبته حاجة قال تفداك

ما يوم خلا بخاطرك شي يعجبك

أبوك لا حدك زمانك على أقصاك

ما صد عنك لو تكاثر مصايبك

هو الوحيد اللي ليا احتج لك جاك

في وقت ما تلقى حبيبك وصاحبك

لا خطيت في حقه دمح لك خطاياك

حتى لو تقصر معه ما يحاسبك

أعطه ولا تبخل عليه بعطاياك

ولا تنتظر منه يجي لك ويطلبك

بره ما دامه عايش الوقت وياك

أخاف لا من مات قلبك يأنبك

إذا خسرت أبوك خسرت دنياك

رح عاد حس بوقتها وش مكاسبك

قصيدة: بابوي ليتك حي وتشوف حالي

قال الشاعر فهد الديحاني:

يا بوي ليتك حيّ وتشوف حالي

تشوف وش هو صار من بعد فرقاك

صار الوطن بعدك من الناس خالي

صار الوطن غربة بعد مافقدناك

يا بوي أنا بعدك سهير الليالي

مقهور من دنياي منّـا ومنّاك

حدتني الدنيا وأنا راس مالي

إني عزيز النفس مثلك وشرواك

ما في شي في حياتي صفالي

حتى الورود إن جيتها صارت أشواك

أطيح وأحمل عليه أثقالي

وأتخيلك مديت لي كف يمناك

بعدك ولا مرة ترى إرتاح بالي

أصفّق على كفي ندم وأتحراك

من ضيقتي ياكم أصّدق خيالي

وأقوم أدوّر عنّك وأقول بلقاك

أضيع بالعالم وهمي سؤالي

هو أنت وينك ليه ما عاد شفناك

أدري لو إنك حي يا عز غالي

يمديك تفزع قبل ماجيك وأنخاك

ويلاه يا حالي وماهو جرالي

ويلاه يا قلبٍ تعذب في طرياك

ويلاه يا بويه من أول وتالي

لا والله أول كان ينجيني ادّعاك

واليوم من بعدك وش اللي بقالي

غير إني أدعي ربي يغفر خطاياك

يالله حطّه وسط منزال عالي

في جنة الفردوس يارب الأفلاك

واغفر ذنوبه ياعزيز الجلالي

واشرح لي صدرٍ ضاق من جور دنياك

لقراءة المزيد ممّا قيل عن الأب، ننصحك بالاطّلاع على هذا المقال: أجمل ما قيل عن الأب.

المراجع[+]

1. ↑ "يا بوي اكتب فيك من الشعر ابيات"، ملتقى طلاب وطالبات جامعة الملك فيصل وجامعة الدمام، اطّلع عليه بتاريخ 2020-11-19. بتصرّف.