أشعار سيد حجاب

أشعار سيد حجاب
أشعار سيد حجاب

قصيدة: وقلنا واللي تغره يخسر مصيره

قال الشاعر سيد حجاب:

وقلنا واللي تغره يخسر مصيره

قالوا الشيطان قادر وله ألف صورة

قلنا ما يقدر ع اللي خيره لغيره

إيه معنى دنيتنا وغاية حياتنا

إذا بعنا فطرتنا البريئة الرقيقة

إزاي نبص لروحنا جوا مراياتنا

إذا احنا عشنا هربانين من الحقيقة

المال تجيبه الريح وتاخذه الهوايل

أما البنون يوم الحساب بيفوتونا

مال إيه ده لو كان مال قارون كله زايل

ولا غير عمايل الخير ياهو ينجدونا

قالوا زمان دنيانا دنيا غرورة

وقلنا واللي تغره يخسر مصيره

قالوا الشيطان قادر وله ألف صورة

قلنا ما يقدر ع اللي خيره لغيره

ومين نكون إن بعنا يومنا وماضينا

وليه نعيش إذا كانش بكرة يراضينا

وازاي ننام من غير ما نحلم ببكرة

وبكرة ده منين ييجي إلا بإيدينا

قالوا زمان دنيا دنية غرورة

وقلنا واللي تغره يخسر مصيره

قالوا الشيطان قادر وله ألف صورة

قلنا ما يقدر عللي خيره لغيره

وقال في النهاية:

بأحلم وافتح عنيا على جنة للإنسانية

والناس سوا بيعيشوها بطيبة وبصفو نية

أحلامي تصلبلي ضهري ويروق ويصفالي دهري

ويلالي زهري وجواهري لكل ناسي وليا

بأحلم وافتح عنيا على جنة للإنسانية

والناس سوا بيعيشوها بطيبة وبصفو نية

يا دنيا مهما تغري غيري مسيرك تمري

وبعد مري تسري نفسي العفيفة الغنية

بأحلم وافتح عنيا على جنة للإنسانية

والناس سوا بيعيشوها بطيبة وبصفو نية

لا المال ينور طريقي ولا البنون بلوا ريقي

عملي في حياتي رفيقي في وقفتي الآخرانية

بحلم وافتح عنيا على جنة للإنسانية

والناس سوا بيعشيوها بطيبة وبصفو نية.

قصيدة: ومنين بيجي الشجن

قال الشاعر سيد حجاب:

منين بيجي الشجن من اختلاف الزمن

ومنين بيجي الهوى من ائتلاف الهوى

ومنين بيجي السواد من الطمع والعناد

ومنين بيجي الرضا من الإيمان بالقضا

من انكسار الروح في دوح الوطن

يجي احتضار الشوق في سجن البدن

من اختمار الحلم ييجي النهار

يقعد غريب الدار الأهل وسكن

منين بيجي الشجن من اختلاف الزمن

ومنين بيجي الهوى من ائتلاف الهـوى

ومنين بيجي السـواد من الطمع والعناد

ومنين بيجي الرضا من الإيمان بالقضا
ليه يا زمان ما سبتناش أبرياء
وواخدنا ليه في طريق ما منوش رجوع

أقسى همومنا يفجر السخرية

وأصفى ضحكة تتوه في بحر الدموع

منين بيجي الشجن من اختلاف الزمن

ومنين بيجي الهـوى من ائتلاف الهـوى

ومنين بيجي السـواد من الطمع والعناد

ومنين بيجي الرضا من الإمان بالقضا

ولفين يأخذنا الأنين لليالي ما لهاش عينين

ولفين يأخدنا الحنين لواحة الحيرانين

ما تسرسبيش يا سنينا من بين ايدينا

ولا تنتهيش ده احنا يا دوب ابتدينا

واللي له أول بكـرة حيبان له آخر

وبكرة تفرج مهما ضاقت علينا

ولفين يأخذنا الأنين لليالي مالهاش عينين

ولفين ياخدنا الحنين لواحة الحيرانين

لا بد من بكرة اللي طال انتظاره

ده مهما طال الليل بيطلع نهاره

ومهما طال درب الهموم والمساخر

لا بد ما يعود اللي سافر لداره.

قصيدة: كل سلم آخره كرسي

قال الشاعر سيد حجاب:

كل سلم آخره كرسي

كل كرسي وله سلالم

إنجليزي ده يا مرسي؟

لأ ده علم وله معالم

التسلق والوصول

علم شغال له أصول

إن جهلته تعيش جهول

وإن حفظته وكنت غول

وابن عالمة حتبقى عالم

وهس ياد يا بت هسي

ده كل سلم آخره كرسي

في القانون الانتهازي

للوصول البرجوازي

مادة أولى: بيع ضميرك

ودن طين وعين إزازي

مادة ثانية: اربط مصيرك

باللي فوق برباط فولاذي

مادة ثالثة: دوس في سيرك

عاللي تحتيك وابقي نازي

والمهم أوزن ووازي

فين تنخ وفين ترازي

تئذي مين ومين تجازي

وإمتى تبقي ذليل مسالم

وهس ياد يا بت هسي

ده كل سلم آخره كرسي

النظام لو كان يساري

كون يساري إراري قاري

وامشي ع الخط اللينيني

وأخنق السوق التجاري

ينقلب نظام يميني

تبقي ليبرالي وإداري

وافترض بقي حكم ديني

بقى إرهابي انتحاري

وأجلد اللي لابسه عاري

وأقني في السر الجواري

زي جدك الانكشاري

اللي كان مهووس وظالم

وهس ياد يا بت هسي

قصيدة: سلوا قلبي وقولوا لي جوابا

قال الشاعر سيد حجاب:

سلوا قلبي وقولوا لي جوابا

لماذا حالنا أضحى هبابا

لقد زاد الفساد وساد فينا

فلم ينفع بوليس أو نيابة

وشاع الجهل حتى أن بعضا

من العلماء لم يفتح كتابا

وكنا خير خلق الله صرنا

فى ذيل القايمة وفي غاية الخيابة

قفلنا الباب أحبطنا الشبابا

فأدمن أو تطرف أو تغابى

أرى أحلامنا طارت سرابا

أرى جناتنا أضحت خرابا

وصرنا نعبد الدولار حتى

تقول له إنت ماما وإنت بابا

وملياراتنا هربت سويسرا

ونشحت من الخواجات الديابة

ونهدى مصر حبا بالأغاني

فتملؤنا أغانينا اغترابا

وسيما الهلس تشبعنا عذابا

وتشبعنا جرائدنا اكتئابا

زمان يطحن الناس الغلابة

ويحيا اللص محترما مهابا

فكن لصا إذن أو عش حمارا

وكل مشًا إذن أو كل كبابا

ودس ع الناس أو تنداس حتى

تصير لنعل جزمتهم ترابا

أمير الشعر عفوا واعتذارا

لشعرك فيه أجريت انقلابا

وما نيل المطالب بالطيابة

دى مش دنيا يا شوقي بيه دي غابة.

مقطوعة: زي الهوا الساير وخيال الطيف

قال الشاعر سيد حجاب:

زي الهوا الساير وخيال الطيف

أحلى سنين العمر بينا تمر

يا نعيش هوانا حلم ليلة صيف

يا تتوه خطانا في ليل شتانا المُر

ولما تتلاقى الوشوش مرتين

ما بيتلاقوش يوم اللُقا التاني

عمر الوشوش ما بتبقى بعد السنين

نفس الوشوش دي بتبقى شيء تاني

بتبدل الأيام ملامحنا

ترعشنا تنعشنا تشوشنا

يا ترى اللي بيعيش الزمن احنا

ولا الزمن هو اللي بيعيشنا.

مقطوعة: وينفلت من بين أيدينا الزمان

قال الشاعر سيد حجاب:

وينفلت من بين إيدينا الزمان

كأنه سَحبة قوس في أوتار كمان

وتنفرط ليّام عقود كهرمان

يتفرفط النور والحنان والأمان

وينفلت من بين إيدينا الزمان

الشر شرَّق وغرَّب داخل في حوشنا

حوشوا لا ريح شاردة تقشقش عشوشنا

حوشوا شرارة تطيش تشقق عروشنا

وتغشنا المرايات تشوش وشوشنا

وتهيل تراب ع الهالة والهيلمان

وينفلت من بين إيدينا الزمان

الغش طرطش رش ع الوش بُوية

ما دريتش مين بلياتشو أو مين رزين

شاب الزمان وشقيقى مش شكل أبويا

شاهت وشوشنا تهنا بين شين وزين

ولسه ياما وياما حنشوف كمان

وينفلت من بين إيدينا الزمان

وينفلت من بين إيدينا الزمان.

24 مشاهدة